.png)
كتاب النقد الفنى.. دراسة جمالية ل جيروم ستوليتز..ترجمة د فؤاد زكريا
صدفة لطيفة حصلتلى النهاردة.. بس الصدف الحلوة دى بقت متكررة معايا كتير وليها سبب.. بس قبل ما اقول السبب.. احكى عن الصدفة.
بقالى يمكن شهور فى فكرة فى بالى بتروح وتيجى زى افكار تانية.. بس لسه مش قادر امسك اللب بتاعها عشان اقدر اتكلم باريحية عنها.. وهى فكرة النقد على العمل الفنى وازاى نقدر نجذم بحق او جمالية العمل ده وباسباب منطقية نقدر بيها نتكلم عنه.. عشان نقدر نشاور عليه ونقول العمل س ممتاز عشان واحد واتنين وتلاتة.. وتكون اسباب منطقية مش مجرد انطباع الاعجاب وخلاص.
كنت هبدأ النهاردة الصبح .. بس فى نداء فى داخلى قالى اجل الكنابة دى او يمكن لان الفكرة لم تنضج على سبيل التاكد او حتى افادة المتلقى بكلامى.. فقررت مكتبش.
بس عينى وانا واقف بفكر اكتب ولا مكتبش..على رف مكتبتى الجميلة.. وزى ما تقول الفكرة اللى شاغلة بالى بتبحث عن طريق عينى عن عنوان يجاوب على السؤال او الفكرة.
او يمكن على سبيل العادة انى اقرا كتاب نقد كل يوم جمعة على سبيل المذاكرة.. فوقعت عينى على كتاب او مجلد عنوانه النقد الفنى.. دراسة جمالية ل جيروم ستوليتز..ترجمة د فؤاد زكريا.. الكتاب مروكون فى اعلى رف فى المكتبة.. وقفت واحضرته ونفضته..جيبته من سنين من الهيئة العامة للكتاب..فتحت الفهرس..الباب الاول..التجربة الجمالية.. الباب التانى..طبيعة الفن..الباب التالت..تركيب الفن..الباب الرابع.. مشكلات فى علم الجمال.. الباب الخامس.. تقدير الفن..الباب السادس.. النقد..الباب السابع..الوظيفة التربوية للنقد.
مقدرتش استمد اهمية الكتاب الا بعد ما افرغت من قراءة مقدمة المترجم المهمة جدا واللى ملخصها بيقول ان فلسفة الفن بتقدر تجاوبنا على سؤال لماذا هذا العمل الفنى جميل؟ دى مهمتها الوظيفية لقول لماذا هذا جميل.
ولما دخلت فى جزء بسيط من الكتاب كرر مؤلفه بضرورة الاجابة على سؤالى..
الكتاب جميل ومحتمل يكون كتابى النقدى لهذا العام والصدفة وحدها خلتنى اجيب الكتاب بايدى ويحاول انه يقولى اهو سؤالك احتمال يكون له اجابة عندى.
اما اسباب تكرار الصدف الحلوة اللى زى دى فيمكن راجعة لزى ما ذكرت من قبل ان ربطى خطة شراء الكتب فدماغى مربوط بمجموعة من الافكار او الاسئلة اللى محتوى عليها نقاط شغفى القرائى.. فيمكن ده مربوط دايما بذوقى فى اختيارات الكتب.
فحاول دايما تربط افكارك بكتبك واحتفظ باسئلتك اللى لسه متجاوبتش وهتلاقى مع مرور الوقت الكتب اللى فى لحظة ما حصلت معايا النهاردة.. بتسعدك وانت بتقراها.
